Hér má sjá dagsetningar Náttúrubarnaskólans á Ströndum fyrir sumarið 2019! 
Í sumar verður þó líka sú nýbreytni að Náttúrubarnaskólinn mun heimsækja fleiri staði og halda námskeið og hlökkum við til að deila því með ykkur!

Því miður lá heimasíða Náttúrubarnaskólans niðri meiri part ársins 2018 en við fögnum því að hún er nú komin í loftið á ný og hlökkum til að segja ykkur frá því sem er framundan!

Langar þig að komast í betri tengsl við þitt innra náttúrubarn? Vertu þá velkomin á Náttúrubarnahátíð á Ströndum. Þar gefst þér tækifæri til að finna og rækta náttúrubarnið í þér á skemmtilegri dagskrá fullri af allskonar fróðleik og fjöri! Hátíðin er fyrir alla fjölskylduna og náttúrubörn á öllum aldri!

Náttúrubarnahátíðin verður haldin á Sauðfjársetrinu í Sævangi á Ströndum.
Aðgangseyrir er 3.000 kr. en hægt er að kaupa sig inn á hvern dag fyrir 1.500 kr.

Það er frítt fyrir hátíðargesti að gista í tjaldi á Kirkjubóli sem er rétt hjá Sævangi. Einnig er frábært tjaldsvæði á Hólmavík og ýmsir gististaðir í nágrenninu. Sundlaugin á Hólmavík býður gestum hátíðarinnar sem eru 14 ára og yngri frítt í sund meðan á hátíðinni stendur og eldri borga hálft gjald.

Dagskrá hátíðarinnar:


Föstudagurinn 28. júlí​

17:00 Stutt og skemmtileg gönguferð. Gengið frá Húsavíkurkleif að Sævangi.
18:30 Setning hátíðarinnar. Dagrún Ósk yfirnáttúrubarn segir nokkur orð. Gengið að veðurupplifunarstöðinni og framkvæmdur veðurgaldur til að tryggja gott veður alla helgina.
19:00 Tónleikar með hinni frábæru hljómsveit Ylju.
20:15 Náttúrubarnakviss. Skemmtilegur spurningaleikur fyrir alla fjölskylduna. Sauðfjársetur á Ströndum býður hátíðargestum upp á vöfflur, djús og kaffi að kostnaðarlausu.
22:30 Fjörusöngur.


Laugardagurinn 29. júlí

11:00 Náttúrujóga, hugleiðsla og hljóðslökun með koparhörpu með Arnbjörgu hjá Jógahjartanu.
12:00 Sirkus sýning. Hluti sirkushópsins Melodic Objects sýnir Same Picture – Different Pose.
12:30 Náttúrufjör: Jurtalitun, unnið úr ull, unnið úr rekavið, tálgað, Strandahestar, Ynja Art með
myndlistarsýninguna Hlýnun, náttúrumarkaður, opið hús í tilraunastofunni og plastdýragarðinum. Ljósmyndamaraþon og fleira.
14:00 Trommutúttur: skemmtileg smiðja þar sem sköpunarkraftur og efniviður úr umhverfinu og náttúrunni er nýttur til trommu- og hljóðfæragerðar. Í framhaldinu verður haldinn trommuhringur þar sem allur hópurinn lætur ljós sitt skína og trommuna óma. Listrænn stjórnandi smiðjunnar er Arnar Snæberg Jónsson.
14:15 Skemmtileg og fræðandi gönguferð þar sem plöntur í umhverfinu verða skoðaðar með Hafdísi Sturlaugsdóttur hjá Náttúrustofu Vestfjarða.
16:00 Útieldun: spennandi smiðja þar sem náttúrubörn læra að kveikja eld, umgangast hann og náttúruna af virðingu og um leið nýta afurðir náttúrunnar í mat og drykk.
16:15 "Hvers vegna á ég að vernda náttúruna og hvernig fer ég að því?" Stórfróðlegt spjall með umhverfisstjórnunarfræðingnum Stefáni Gíslasyni.
18:00 Fuglafjör: Trítlað um teistuvarpið.
20:00 Snillingurinn Svavar Knútur með tónleika.
21:30 Drauga- og tröllasögur í sagnahúsinu!


Sunnudagurinn 30. júlí

11:00 Skemmtilegt spjall um sjósund með þjóðfræðingnum Pétri Húna Björnssyni. Hefur þig alltaf langað að prófa en aldrei þorað? Nú er tækifærið! Þeir sem áhuga hafa láta vaða í sjóinn eftir fróðleikinn. Við mælum með að skella sér í heita pottinn á Hólmavík eftir sjóinn!

13:00 Hinn stórskemmtilegi töframaður Ingó Geirdal með sýningu.
14:00 Útileikir á Sævangsvelli.
16:00 Fjölskyldufjallganga. Kirkjubólshringurinn genginn. Gangan tekur um það bil 2 klst. og hækkun er 220 m.   

Núna í sumar voru Náttúrubarnaskólinn og Strandabyggð í samstarfi um Skapandi sumarstörf. Þá fóru ungmenni í vinnuskólanum í skapandi sumarstörf hluta tímans undir leiðsögn Dagrúnar Óskar yfirnáttúrubarns. Það var mikið fjör og gerðu krakkarnir ýmislegt skemmtilegt. Þau bjuggu meðal annars til listaverk fyrir Hamingjudaga á Hólmavík þar sem fólk gat velt því fyrir sér hvað hamingjan er í raun og veru, bjuggu til hengirúm úr rekavið og neti á Sauðfjársetrinu og risastórann draumafangara. Auk þess sem þau skreyttu tilraunastofu Náttúrubarnaskólans og gengu frá henni svo hægt væri að taka hana í notkun. 

Þau tóku einnig þátt í verkefni sem heitir Hólmavík - Íbúabyggð og ferðamannastaður og komu upp með hugmyndir um hvað myndi gera bæinn að betri stað til að búa á og einnig til að heimsækja. Þetta verkefni gekk mjög vel og söfnuðust rúmlega 100 hugmyndir en niðurstöður vinnunar er hægt að nálgast í Facebook hóp með sama nafni. 

Ætlunin er síðan að skrifa skýrslu þar sem eitthvað af hugmyndunum verða lagðar fram og sjáum við þær því vonandi verða að veruleika á næstu árum. 

Þá stóðu þau fyrir viðburði á Hólmavík sem hét Heyhey- sumarfjör. Þar voru leikir, vatnsrennibraut og meira fjör og mættu rúmlega 50 manns á viðburðinn. Þau sáu um skipulagningu, undirbúning, markaðssetningu og stjórnun sumarfjörsins.

Krakkarnir aðstoðuðu líka við undirbúning Náttúrubarnanámskeiða, komu með hugmyndir af leikjum, földu hamingjusteina í fjörunni, þróuðu leiki fyrir Furðuleikana og fleira. Einnig aðstoðuðu þau við undirbúning Náttúrubarnahátíðar á Ströndum sem er haldin helgina 28.-30. júlí. Þá bjuggu þau til ljósmyndamaraþon sem notast verður við á hátíðinni, útidót sem þau smíðuðu úr rekavið, Náttúrubarnasýningu sem verður á Sauðfjársetrinu þessa helgi, fuglaspil til að þekkja fugla og margt fleira. 

​Núna er veturinn kominn! Þá er um að gera að skella sér út að leika í snjónum!

​Hér eru nokkrar hugmyndir um hvað er hægt að gera saman úti í vetur:

Búa til snjókarl
Það er alltaf gaman að búa til snjókarl, eða snjóskrímsli eða bara snjó hvað sem er! Það er um að gera að gefa ímyndunaraflinu lausann tauminn og búa til eitthvað sniðugt úr snjónum. 

Fara út að renna sér
Það er líka fjör að renna sér niður brekkur á sleða, skíðum, snjóbretti eða ef allt annað bregst, svörtum ruslapoka! Maður getur farið ótrúlega hratt ef manni tekst að finna góða brekku!

Búa til snjóhús
Það er líka hægt að byggja snjóhús eða göng í góðum skafli. Það er líka svo gaman að liggja þar inni þegar það er tilbúið með kerti og spjalla saman og jafnvel drekka kakó.

Fara á skauta
Það er alltaf mjög vetrarlegt að skella sér á skauta!

Nota grýlukerti fyrir íspinna
Grýlukerta íspinnar eru bæði mjög flottir og gómsætir!

Hugsa um fuglana
Þegar mikill snjór er úti er gott að hugsa aðeins um smá fuglana og fara út með korn handa þeim að borða. Einnig væri gaman að byggja fuglahús saman og setja upp úti í garði.

Fara í gönguferð
Það er alltaf hægt að fara í gönguferð sama hvort snjóar eða ekki! Það er líka svo ævintýralegt að virða fyrir sér náttúruna og umhverfið í vetrar búning. 

Fara í sund
Það er líka alltaf gaman að fara í sund og þegar mjög kalt er úti verður extra þægilegt að slappa af í heita pottinum. 

Föndra 
Það er hægt að fá allskonar hugmyndir af vetrarlegu föndri á pinterest.com. Þá væri til dæmis hægt að föndra kertastjaka úr trjágreinum eða snjókorn úr eyrnapinnum og mála snjókarla á steina.

Leiktu þér úti með vasaljós
Á Íslandi verður dimmt mjög snemma yfir vetrartímann. Þá getur verið gaman að fara út í gönguferð með vasaljós, segja draugasögur eða ímynda sér að þau séu geislasverð. 

Skoða stjörnurnar og norðurljósin
Þá er tilvalið að leggjast út í náttúruna og skoða stjörnurnar og norðurljósin og reyna jafnvel að sjá út einhver stjörnumerki og eiga svolítið Lion king móment.

Allt passar þetta svo einstaklega vel með heitu kakó-i!
Njótið vetrarins!

Í gær var þátturinn þar sem Náttúrubarnaskólinn birtist í Landanum sýndur í sjónvarpinu.
Ég var sjálf mjög ánægð með þáttinn og hann var mjög skemmtilegur! Krakkarnir voru algjörir snillingar og strákurinn með allar marglytturnar var ótrúlega fyndinn! Reyndar eru allir krakkarnir sem koma í Náttúrubarnaskólann algjörir snillingar og töluðu þau um það þegar þau komu til að taka upp Landann hvað krakkarnir væru áberandi opnir, uppátækjasamir og spyrðu mikið. Þetta var ótrúlega skemmtilegt og þið getið horft á þáttinn með því að ýta á linkinn hérna fyrir neðan:

​http://www.ruv.is/frett/laera-ad-taka-eftir-tofrum-natturunnar 

​Jæja sumarið var snilld, takk fyrir það!!

Í sumar tók Náttúrubarnaskólinn á móti nokkrum hópum í maí sem var mjög skemmtilegt, við tókum til dæmis á móti 44 börnum úr grunnskólum í Búðardal, 14 nemendum í umhverfisfræði frá Bandaríkjunum, héldum kynningu á listamannaþingi Félags listamanna á Vestfjörðum, Grunnskóla börnum á Hólmavík sem komu með hænuunga í vist á Sauðfjársetrinu.